نظرية الطشت لحل المشكلات

كل واحد فينا بيجيلة وقت وتقابلة مشاكل في حياتة واحيانا بيكون شايف ان المشاكل دي مالهاش حل او حلولها صعبة بالنسبة له وبيكون محتاج طريقة سهلة وبسيطة عشان يحل بيها مشكلتة …

وعشان كدة حابب اعرض عليكم طريقة سهلة بعنوان ” نظرية الطشت” …. ايوة نظرية الطشت لحل المشكلات. بص ياسيدي ببساطة كدة ومن غير اي تعقيد لو جبت تيشرت من دولابك وحطيت علية مانجة او فراولة مثلا وبقعت فيه ، وسئلت والدتك هايكون ردها كالتالي : روح انقعة في طشت ماية عشان البقعة تطلع. تروح انت تجيب الطشت وتحط فية الماية والمسحوق وبعدين تنقع التيشرت فية ، وتيجي بعد نص ساعة تبص علية تلاقية لسة منضفش تضايق ، فتفكر مثلا انك تضيف له كلور بس الكلور ممكن يبوظ الالوان و يضعف القماش ،او ممكن تفكر بطريقة مختلفة فتحاول تدعكة او تنظفة بفرشاة خشنة ولكن ممكن التيشرت يتقطع او علي المدي البعيد القماش يبقي ضعيف .

طشت

>>> المشكلة الي في حياتك هي بالظبت البقعة الي في التيشرت ، وبالتالي انصحك تتبع نصائح وارشادات نظرية الطشت لحل مشكلاتك ، وهي :-

– انت وقت ماشوفت البقعة في التيشرت وقتها بس فكرت في التنظيف ، يعني ببساطة اعترف وواجه نفسك ان هناك مشكلة لتبدأ في التفكير في الحل .

– عشان تنظف البقعة او بمعني اخر تحل المشكلة فانت محتاج لشوية ادوات وموارد زي مثلا : واحد صاحبك او فلوس او … الخ

– وطبعا انت عارف ان المسحوق مش هاينضف من غير الماية ، يعني انت لازم تختار البيئة المناسبة الي تشجعك علي ايجاد الحلول .

– زي ماقولنا انك لو حاولت تدعكها او تنظفها بفرشة خشنة ممكن تقطع القماش او تأثر علي قوتة ، فبالتالي متحاولش تضغط علي نفسك في اختيار حل مش مناسب بدافع انك عايز تخلص بسرعة ، وفقط اختار الانسب لك.

– متحاولش تضيف لمشكلتك حاجات او تدخل اشخاص ممكن تضرك او ممكن تخسرك اكتر ، زي الكلور ما بيبوظ الالوان. – الغريب بأه في الموضوع انك لو سبت التيشرت من باليل للصبح يعني فترة كافية هاتلاقية نضف وبقا زي الفل وبالتالي انت محتاج انك يكون عندك صبر وتأني في حل المشكلات.

– وطبعا انت عارف ان المياة مش هاتبقي مفيدة طول ماهي لسة في الحنفية ، ودة معنا انك لازم تبذل شوية مجهود عشان توصل لحل المشكلة.

– عملية النقع كلها لازم تحصل جوة طشت ، ويكون الطشت دة يقدر يستوعب التيشرت وباقي الادوات ، فبالتالي لازم تختار مكان مناسب للحل . – الطبيعي بعد ماتخلص عملية النقع تاخد التيشرت تنشرة في الهواء عشان ينشف وممكن بعد ماينشف تظهر البقعة بشكل اقل من السابق ، ودة معناة انك لازم تدي فرصة لنفسك تختبر فيها الحل وتقيمة ، وتعدل علية لو محتاج.

– خد بالك بعد ماتنتهي كل الخطوات الي فاتت دي والتيشرت ينظف لازم ترمي الماء الباقي في الطشت ، يعني المشكلة بعد ماتنتهي لازم تمسحها من عقلك وفقط تعلم منها الخبرة للمستقبل.

عيل بيستحما

 

… وبعد صبر طويل ومجهود منك هاتقدر تزيل كل بقعك باذن الله وهاتبقي زي الفل ان شاء الله ، بس خليني اسئلك سؤال

 

 اخير :

هل انت النهاردة هاتبدأ تحل كل مشاكلك ولا حابب تعيش مبقع ؟!!!

اتمني بجد تكون وصلت الرسالة ..

دمتم سعداء

م. احمد جمعة

رئيس مجلس ادارة فريق ابني نفسك

www.abninafsak.com

شارك المحتوى علي المنصات المختلفة

اترك تعليقاً