تعاشب شاي …. هايغير حياتك

من كام يوم كدة واحد صاحبي جابلي شاي بنكهة الشمام وشاي تاني بنكهة الاعشاب البرية والبرجموت
وطبعا مش هاقولكم ع الطعم الغريب الي متتوقعش ان في يوم انك هاتدوقة في ماية سخنة وبصراحة دي مش اول مرة اجرب شاي بنكهات غريبة .

الغريب باه فالموضوع هو اني اتبسطت ؟!
تعاشب شاي
وبصراحة كان طعمة رائع والسبب هو اني خرجت برة منطقة الامان وكسرت حاجز (الي نعرفة احسن من الي منعرفوش) وجربت وشربت شاي غير الي متعود علية بقالي سنين طويلة

ودة اكدلي قانون من قوانين العقل اسمة قانون ( التعويض او الاستبدال او الاحلال) ودة بينص علي ” ان العقل يمتلك فكرة واحدة عن الشئ الواحد فاذا ادخلنا الفكرة الايجابية احلت محل الفكرة السلبية او العكس ”

وبالظبت دة الي بيحصل معانا لما نكون مثلا شايفين شخص دمة تقيل او قليل الزوق وبعدين تجبرنا الظروف اننا نقرب من الشخص دة وبعدها نكتشف انة عندة زوق وعلي اخلاق كويسة ووقتها حتي ممكن نقول لة انت طلعت غير ماتوقعت خالص !

وعشان كدة انت من هنا ورايح قبل ماترفض شئ او تقبلة هاتجربة وتحكم بعقلك ودة طبعا طالما التصرف دة في حدود اللياقة والادب والدين.

بس خليني اسئلك سؤالين وياريت تكتب اجابتهم في كومنتات قبل ماتشير المقال وانت بتعمل منشن لصحابك .

* تحب تعيش اسير للي تعرفة احسن متعرفوش ولا تحب تتحرر ؟!

* و ياريت تكتبلنا اية العادة او السلوك الي انت لسة اسير له ونفسك تتخلص منة ؟ وقولنا هاتعمل اية عشان تتخلص منة لو تعرف ؟

#دمتم_احرار
#احمد_جمعة

شارك المحتوى علي المنصات المختلفة

اترك تعليقاً