الكيس المخروم

السلام عليكم ورحمة الله وبركاتة

طبعا كلنا عارفين ان مصر الايام دي بتمر باهم مراحل تاريخية في مصر .. “الانتخابات الرئاسية” والي فيها الشعب هايختار اول رئيس لمصر بعد الثورة ، والي هايكون املنا كله فية انة يطور البلد ويراعي مصالح الشعب ….الخ

المهم بدون اي مقدمات
امبارح كالعادة باليل وانا مروح من المكتب وزيي زي اي مواطن كادح بركب مواصلات … المفروض ان في 48 ساعة صمت انتخابي ..ورغم ذلك لاقيت في بعض المرشحين بيوزعو دعايا وفلايرز المهم لما ركزت شوية فهمت انهم بيوزعوها وهم مبيتكلموش ولا بيعملو اي صوت
( وبكدة فهمت يعني اية صمت انتخابي )

المهم اخدت الفلاير وادوني بوستر للمرشح وركبت مواصلات تقريبا كل العربية كان معاهم نفس الفلايرز
كان قاعد جنبي راجل ابن حلال عمل حاجة معظم الناس بتعملها
بعد ماخلص قراءة راح مكرمش الورقة وكان هايرميها من الشباك بتاع العربية
روحت قايلة من فضلك بدل ماترميها من الشباك اديهالي وانا هارميها في الباسكت لما انزل
الراجل بصراحة اتكسف وقالي لأ لأ دة انا مكنتش هارميها دة انا بكرمشها عشان اشيلها في جيبي وارميها لما انزل
هههههههههه قولتله طب تمام ربنا يباركلك
وفعلا مرماش الورقة .. والحمد لله ربنا جعلني سبب في اماطة الاذي عن الطريق

الغريب بأة رغم كل الي حصل دة الا ان مفيش دقيقتين وببص في الكرسي الي ورايا لاقيت شاب زي الورد وشكله طالب جامعي ومحترم كدة وابن ناس وكان بيقرأ نفس الفلاير واول ماخلص بكل بساطة وكأنة شئ طبيعي راح مكرمش الورقة وراميها من الشباك وانا مقولتلوش حاجة كل الي حصل اني بصيتلة وبس وقعدت اضحك من جوايا طول السكة
… لكن وانا بضحك فكرت كتير في حال الناس وفي المجتمع الي احنا عايشين فية وازاي نتخلص من كل السلبيات السلوكية دي

فأكتشفت ان مصر عامله زي السمكة الي محطوطة جوة كيس فية مياة
والكيس مخرررروم
والمياة بتقل وبتنقص في الكيس .. وكل مانسد الخررررم نلاقي واحد تاني و تالت … ولو ملحقناش نغير الكيس دة السمكة هاتموت من نقص المياة

طبعا فهمتو اقصد اية !!!

سؤالي بأة … وبكل بساطة
ياتري تحب تكون انسان محترم بيحب البلد وبيحافظ عليها ؟؟؟
ولا عايز تبقي خرم ؟؟؟

————————————
واقبلوا اعتزاري عن بعض المصطلحات الغير اللائقة

مع خالص تحياتي
مهندس / أحمد جمعة

Facebook Twitter Email

Comments

comments

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *